Celebración do XVI Certamen literario

Como cada curso escolar o departamento de Lingua castelá e literatura convocou o XVI Certamen literario  "Sea breve, por favor" para celebrar o Día do libro.

Como resultado, déronse dous premios por ciclo e realizouse unha bonita entrega de premios, á cal baixaron dúas clases como ointes, os premiados e os participantes na cerimonia.

A cerimonia consistiu nun pequeno concerto do coro do IES Afonso X O Sabio e no visionado de varias curtametraxes, como esta feita por alumnado de 4ºESO de Artes escénicas.

Desde aquí moitas grazas ao departamento de Lingua castelá por organizar o evento e ao de Música por colaborar na entrega de premios.

Actividade literaria con Cándido Pazó

 

Hoxe o IES Afonso X O Sabio organizou unha charla para todo o alumnado de 1º de Bacharelato cun dos máis recoñecidos dramaturgos galegos, Cándido Pazó. Neste caso a actividade estivo subvencionada polo Ministerio de Educación, dentro do programa Por qué leer a los clásicos? e versou sobre os xéneros literarios e, en concreto, sobre La tribuna de Emilia Pardo Bazán, a quen rendimos unha pequena homenaxe no ano do seu centenario. Por mor das restriccións da pandemia a actividade realizouse en dúas quendas, para que así puidese asistir todo o alumnado do curso. Desde aquí esperamos que sirva para reflexionar sobre as aportacións da gran escritora Emilia Pardo Bazán, de como escribiu sobre o noso entorno, das personaxes femininas e, tamén, de como se pode trasladar a narrativa ao teatro.

A actividade estivo organizada polo Equipo de Normalización Lingüística e vicedirección, coa colaboración dos departamentos de Lingua Galega e Castelá. Grazas a todos e a todas por asistir e colaborar.

Visita aos museos Muncyt e Domus

O pasado venres, día 28 de febreiro, o alumnado de primeiro e segundo de FP Básica visitaron os museos Muncyt e Domus. Esta activade foi organizada conxuntamente polos departamentos de Informática e Lingua Castelá.

No Muncyt fixeron unha visita guiada na que lles mostraron a enciclopedia mecánica, precursora do libro electrónico e inventada pola ferrolá de adopción Angela Ruíz Robles, o ordenador IBM 650 (primeiro ordenador que chegou a España), os proxectores do cine París (primeiro cine de A Coruña) e o avión Boeing 747 “Lope de Vega” entre outras cousas.

Na Domus visitaron as exposicións “Bocados” sobre nutrición e ciencia, “Xenética” e “Evolución” nas que puideron descubrir a cantidade de auga que tiñan no corpo, as calorías que se consumen cando se camiña sobre unha gran roda e a velocidade dun tiro de penalti entre outras cousas. Tamén intentaron relaxarse para gañar un xogo que medía a súa actividade cerebral e puxeron a proba os seus reflexos e axilidade con xogos moi diversos.

Charla con Alfredo Gómez Cerdá

O prolífico escritor de literatura xuvenil, Alfredo Gómez Cerdá, visitou o noso instituto o pasado luns para charlar coa rapazada de 4ºESO sobre a súa última novela Ninfa Rota. Unha obra fantástica que abarca temas tan actuais como a violencia de xénero, o acoso, o control nas redes sociais, a autoestima ou o amor entre adolescentes.
Foi unha charla tan distendida e amena que a todos nos soubo a pouco. Teremos pois que invitalo de novo para continuala...

Visita á RAG e a Casa Museo de Emilia Pardo Bazán

O martes 26 de marzo, luns 1 e martes 2 de abril, o alumnado de 4º ESO realizou a xa tradicional visita á RAG e a Casa Museo de Emilia Pardo Bazán, seguida esta vez dun roteiro literario polos lugares emblemáticos do galeguismo coruñés. Unha visita guiada transportounos a outros tempos a través da casa de Emilia Pardo Bazán, e tamén puidemos desfrutar das explicacións no salón de plenos da institución académica. 

A continuación, realizamos un roteiro literario no cal lemos poemas alusivos aos lugares que percorremos, como as casas de Rosalía de Castro ou de Francisca Herrera Garrido, o lugar de fundación das Irmandades da Fala ou da Editorial Nós, ou as esculturas conmemorativas de Castelao, Cunqueiro e o Gatipedro, Curros Enríquez, María Pita, Sir John Moore ou Eduardo Pondal. Resultou moi interesante ver a cidade desde ese novo punto de vista, repetiremos o próximo ano!

Celebración do día do Libro

O pasado 23 de abril, con motivo do Día do Libro, o departamento de Lingua Castelá organizou unha serie de actividades ao redor do mesmo. 
Ademais de facer unha preciosa exposición co traballo do alumnado, no que os e as estudantes expuxeron os seus traballos relacionados coa temática do conto. Traballáronse os contos infantís, os seus escritores e películas baseadas nos mesmos.

Por último, o luns fíxose entrega dos premios do Concurso de Relatos Cortos, organizado polo departamento de Lingua Castelá e Literatura.
Noraboa aos gañadores e moito ánimo para seguir escribindo tan ben.

Modalidade A (1º e 2º ESO)

primeiro premio: Celia Guerreiro Martín (1º A)

segundo premio: Julia Casal Rey (1ºA)

Modalidade B (3º, 4º e FPB)

primeiro premio: Violeta Meléndrez Doval (3ºA)

segundo premio: Ainara González Abuelo (4ºA)

Accésit 1: Alberto López Beiro (3º C)

Accésit 2: Nicolás guimarey Sabio (3º A)

Modalidade C (Bacharelato e Ciclos)

primeiro premio: Lucía Ramos Prada (1º BAC C)

Desde aquí, moitas grazas tamén ao departamento pola organización de todo.