Concerto de fin de curso

 O pasado día 22 de xuño celebramos no instituto o concerto de fin de curso que, por mor das medidas tomadas polo protocolo COVID, so foi transmitido para o alumnado de 3ºESO e o alumnado participante no concerto.

No concerto participaron o alumnado de:

Obradoiro de música de 1ºESO

Canto coral e técnica vocal de 2ºESO

Todos os grupos de 3ºESO

Os dous grupos de música de 4ºESO

O alumnado de Linguaxe e práctica musical de 1ºBach

O concerto foi presentado por alumnado de artes escénicas e danza de 4ºESO, quenes tamén exerceron de utilleros e acomodadores.

Celebración da graduación de 2ºBACH e 2ºFPB

 O día 11 de xuño por fin celebramos o acto de graduación do noso instituto. Foi un acto moi emotivo e diferente, xa que nesta ocasión participaron exclusivamente os grandes protagonistas: o alumnado e o profesorado.

Nesta ocasión houbo dous discursos de estudantes lidos por Nerea Tomé e Nerea Carballeira e por Sergio Moya. Tamén contamos coa asistencia do concelleiro de Educación Miguel Ángel Gutiérrez, representantes do ANPA Castelao e, por suposto, da nosa Directora Belén Vidal Marcote.

Houbo tamén actuacións musicais; por unha parte, o grupo de música de 2ºBACH, do grupo de canto coral de 2ºESO e tamén unha canción interpretada por Claudia López e Carla Quintián.

Finalmente, repartimos os diplomas e as orlas.

O evento foi gravado por cámaras profesionais e, en canto teñamos o vídeo, subirémolo para ser compartido por toda a nosa comunidade educativa. 

Ao finalizar o evento fixéronnos fotos no exterior, que foron publicadas en La Voz de Galicia.

Celebración do Entroido no noso centro

O día 21 de febreiro, como é habitual no noso instituto, tivemos unha xornada especial coa celebración do Entroido.
O día comezou con dúas sesións de clase ordinarias e despois continuou cun pequeno concerto dos grupos de música de 4ºESO, 1ºBACH e 2ºBACH. Despois comezou un desputadísimo concurso de comparsas de Entroido no que participaron prácticamente a maioría dos grupos da ESO, bacharelato e ciclos. Os premios foron os seguintes:

Premios do primer ciclo:
1º premio: 2ºD
2º premio 2ºC
3º premio 2ºA e mención especial do xurado

Preios do segundo ciclo:
1º premio: 4ºA
2º premio: 1ºBACH A
Premio especial á orixinalidade ao 2º Grao Superior de FP
Mención especial do xurado ao 3ºPMAR
Mención especial ao baile de Mohamed Sene

Rei e Raíña do Entroido:
Nerea Tomé Regueiro e Irene López de Uña

A todos eles e a todas elas moitísimas grazas polo esforzo, a dedicación e a labor de inclusión dos grupos presentados. Os premios consistirán en excursións e pequenas celebracións no centro, para seguir afondando na tarefa da socialización e da inclusión como grupo como forma de mellora da convivencia no noso centro.

Por último, queremos facer un chamamento a seguir participando nos nosos Entroidos, este ano houbo tanta participación que case non nos deu tempo a acabar. Así pois, facemos entrega do MÉRITO AFONSINO  aos grupos de 1ºA, 1ºB, 1ºD, 1ºE, 1ºF, 2ºA, 2ºB, 2ºC, 2ºD, 2ºF, 3ºA, 3ºB, 3ºD, 3ºE e PMAR, 4ºA, B, C, D e 1ºBACH A, 1ºBACH B E 1º e 2º de FPB e 1º e 2º de Grao Superior de FP)

Actividades do proxecto Afonso a escena

Ao longo deste curso desenvolveuse novamente o proxecto Afonso a escena, todas as actividades foron documentadas no blog do proxecto pero queríamos presentar aquí un resumo.
Mantense un coro estable, que se reune para ensaiar dous recreos da ESO semanais e un de bacharelato. Este coro participou no I Encontro de coros escolares do IES Afonso X O Sabio, realizado no Ágora da Coruña e no VI Encontro de coros escolares de Galicia, que tivo lugar no Teatro da Beneficiencia de Ortigueira, ademais tamén interviu nos distintos concertos que se desenvolveron no curso no noso centro (Fin de curso, acto de Graduación e Nadal).

Para poder realizar todas estas actividades realizáronse ensaios semanais fóra das nosas aulas, abríndose as clases de música ao alumnado, para que prepare as distintas cancións e aprenda a cantar e a tocar diversos instrumentos, ademáis de comer co alumnado un martes ao mes e realizar un ensaio específico e realizar distintos obradoiros de interpretación con profesorado especialista.

Por último, traballouse co alumnado dos centros adscritos de primaria (CEIP Graxal, Portofaro e Wenceslao Fernández Flórez) para realizar unha serie de obradoiros de técnica vocal e, no noso centro, interpretar todos xuntos unha canción (Miña terra galega)

Paralelamente, cos grupos de artes escénicas e danza traballouse para colaborar con distintas actividades do centro, realizándose unhas interpretacións de Shakespeare o día de entrega de premios do XXV Concurso de relatos hiperbreves e da interpretación dun pequeno musical de creación propia.

I Encontro de Coros Escolares do IES Afonso X O Sabio

Desde o noso instituto estamos moi contentos de compartir, con toda a nosa comunidade educativa, que estamos organizado un concerto de coros escolares para o próximo día 19 de febreiro no Ágora, no que participará o alumnado do noso coro e outros cinco centros máis da contorna.

O concerto terá lugar ás 11 30 e estades todos e todas invitados...cunha sorpresa ao final.
Anuncio en La opinión de A Coruña

Fin de festa no Afonso X O Sabio

Un ano máis, o IES Afonso X O Sabio acaba o primeiro trimestre cunha boa festa de Nadal. Neste caso tivemos as seguintes actividades para todo o noso alumnado:

Por unha parte, o profesorado de educación física organizou diversas competicións deportivas; o grupo da Biblioteca organizou a proxección da película Campeones, que tivo unha gran acollida entre o noso alumnado; o departamento de inglés e lingua galega, mantivo o tradicional Galeoke, todo un éxito de público e crítica entre os e as estudantes de todos os niveis; ademais, alumnado de todos os cursos participou no festival de música e baile organizado polo departamento de Música, no que participaron estudantes de grupos completos de 2º, 3º, 4º ESO e 1º e 2º de Bacharelato, ademais do fabuloso Coro do IES Afonso X O Sabio. Por último, o departamento de bioloxía, a través da materia de Anatomía Aplicada, repartiu comida saudabre feita polo propio alumnado.

Ademais, a ANPA Castelao repartiu sorrisos e MOITOS doces de Nadal, ASÍ QUE FOI UN AUTÉNTICO PLACER PARA TODOS OS SENTIDOS.

Finalmente, antes do reparto de notas, bailamos todos xuntos co Discoafonso, no que sempre contamos cos distintos DJ que están entre o noso alumnado.
Moitas grazas a toda a nosa comunidade educativa e BO NADAL.

Concerto con De Vacas

O pasado mércores, día 1 de novembro, o alumnado de 3ºESO tivo a oportunidade de acudir ao Forum Metropolitano para unha charla e concerto co grupo galego De vacas

O obxectivo desta actividade foi que o alumnado coñecese grupos musicais actuais que desenvolven a súa actividade en galego, combatendo así os prexuízos que ligan o idioma unicamente á música tradicional, e dando desta forma una visión ampla e actual do mesmo. 

Algúns exemplos deste marabilloso grupo, famoso polas súas estupendas harmonías vocais, ademais do famoso Amodiño (que lle encanta a Luis Fonsi, o seu autor orixinal)

Single ladies, Taxi


Artigo de El País

Concerto para pais e nais

Hoxe, penúltimo día de clase, tivemos un CONCIERTAZO no que participaron máis de 350 rapaces e rapazas do noso centro.

Este evento realizouse fóra do horario escolar, pola tarde, para que puidesen asistir toda a nosa comunidade educativa, xa que estamos moi orgullosas do traballo realizado polas nosas clases.

O concerto comezou coa actuación do noso coro, que interpretaron catro cancións, nas que destacou Gabriel Robledo como solista na canción Meu amor estoupa.

Posteriormente actuaron grupos de 2º ESO, 3ºESO, 4º ESO e 1ºBach. Os de 2º de bacharelato, esta vez, estaban xa de vacacións...

O evento tivo un amplo seguimento nos medios de comunicación, inda que nalgún caso só en prensa escrita.

La Opinión de A Coruña.

Participación do alumnado no IV Encontro de coros escolares de Galicia

Hoxe pola mañá, o alumnado do noso coro participou no IV Encontro de coros escolares que tivo lugar en Ortigueira.

Para o evento, preparamos tres cancións para facer de xeito individual, acompañados polo noso pianista Diego Martínez Bello, e logo ensaiamos dúas cancións para facer co coro do IES de Ortigueira: Banaha e Engine engine. Cada unha delas realizada cun director diferente.

Así o noso alumnado tivo o privilexio de actuar, nun concerto aberto a todo o concello de Ortigueira, no Teatro de la Beneficiencia, precioso espazo construido a finais do século XIX, ademais de volver a traballar con José Antonio García Mato e de facer amigos e amigas novos... xa quedamos para que veñan estes estudantes ao noso concello para o próximo ano!!!


Aquí imaxes dos nosos e as nosas coralistas ensaiando nada máis chegar ao teatro:

Despois xuntámonos ao coro do IES de Ortigueira e comezamos a traballar con José Antonio García Mato:

Finalmente traballamos con Beatriz Alonso a última das pezas que se facían no concerto:

Un saúdo e iremos subindo os vídeos no canle de vídeos do departamento de música do instituto.

Concerto do alumnado

O pasado día 20 de decembro celebramos un concerto de Nadal con alumnado maiormente de música (cursos 2º, 4º, 1ºBACH e 2ºBACH) e de francés (alumnado de 4ºESO). Neste concerto, ademais, participou o coro do instituto.

Para máis información do mesmo podedes acudir ao blog do proxecto Afonso a escena.

Queremos agradecer a dedicación de todas as persoas que axudaron a subir e baixar material, ás profesoras colaboradoras e ao departamento de música e francés, así como a todo o profesorado que permitiu asistir ao concerto aos seus estudantes, xa fose en calidade de oíntes como de intérpretes.

Concerto aberto á comunidade educativa

Como parte das actividades de fin de curso, hoxe o departamento de Música organizou un concerto para toda a comunidade educativa no hall do noso instituto.

O concerto, no que participou alumnado de 2ºESO, 4ºESO e 1ºBacharelato, foi moi variado, destacando a variedade de instrumentos.

Esta xornada, que para o noso instituto é moi festiva, é só unha mostra do traballo que fan os rapaces e as rapazas en clase.

Agradecemos especialmente a implicación de pais, nais e, sobre todo, do noso alumnado, que axudou a montar e desmontar como auténticos músicos profesionais. Ademais de ensaiar duramente para prepararse para o día de hoxe.

Finalmente, queremos incidir tamén na nosa gratitude pola colaboración de Susana Vicente, a nosa xefa de estudos, quen non só é unha boa seguidora dos nosos concertos, senón tamén nos axuda sempre coa montaxe e desmontaxe.