Asistencia ao Congreso LQDV 2023

@s alumn@s de Relixión do IES Afonso X "O Sabio" participaron o 03 de marzo na 14ª edición do congreso Lo Que De Verdad Importa (LQDVI), que se celebrou en PALEXCO (A Coruña) xunto a 1500 moz@s, onde escoitaron grandes historias de constancia, optimismo, superación e esforzo. A Fundación Lo Que De Verdad Importa é unha organización sen ánimo de lucro, cuxo fin non é outro que a difusión de valores humanos universais na sociedade, poñendo o foco en promover e afianzar os pilares humanísticos que sustentan a esperanza dun mundo mellor. Para iso, se divulgan e promoven historias persoais de paz, solidariedade, dereitos humanos, igualdade, superación, tolerancia, acceso á educación e liberdade, entre outros; historias reais de vida que impactan, que inspiran, e que non pretenden en ningún caso dicir o que é importante, senón axudar a que o descubramos. O desexo de transmitir en primeira persoa valores que nos fagan reflexionar sobre o que realmente importa na vida. @s relatores/as foron @s seguintes: Arancha Martínez En 2008 tras unha viaxe á India, deixa o seu traballo na banca de inversión e funda it-willbe.org para introducir eficiencia e innovación no ámbito da cooperación. Liderou a creación de PPA-People´s Protection App sistema de identificación de colectivos vulnerables e recibiu multitude de premios. Ousman Umar Ousman saíu de Ghana con 13 anos. Tras cruzar andando o deserto do Sáhara e sobrevivir a dúas viaxes en patera, aos 17, chegou a España. Hoxe en día ten dúas carreiras, un máster e unha ONG premiada pola ONU. Albert Espinosa Albert Espinosa é escritor, actor e guionista. Aos 13 anos lle diagnosticaron un cancro que lle levou a pasar dez anos en hospitais. Esta experiencia lle inspirou para crear os seus traballos mais exitosos como o guión da película Pranta 4ª e a serie de televisión Pulseiras Vermellas ou os libros “O mundo amarelo” e “Se ti me dis ven déixoo todo… pero dime ven”. Vémonos na seguinte edición LQDVI 2.024!

Visita ao CIQUS

O pasado xoves 9 de febreiro, alumnado de ciencias de 1ºBACH visitou o Campus Universitario Sur de Santiago. En primeiro lugar acudimos ao CIQUS, onde, con motivo da celebración do Día Internacional da Muller e a Nena na Ciencia, os estudantes puideron manter unha serie de encontros con investigadoras para ampliar os seus referentes científicos. Tamén realizaron unha visita ás instalacións para coñecer algunhas das técnicas máis habituais e comprender o funcionamento dos equipos instrumentais máis representativos. A continuación, visitamos o Observatorio de Astronomía Ramón María Aller. Puideron coñecer as diferentes liñas de investigación que realiza o centro, viron os telescopios empregados, curiosidades dos cometas, planetas e outros aspectos do Universo. Para rematar a visita, desfrutaron dunha espectacular observación solar. Ao mediodía, comeron no campus e puideron ver as diferentes facultades de ciencias . Aquí o vídeo da excursión realizada.

Visita á exposición de Peter Lindbergh

O alumnado de bacharelato de debuxo artístico do IES Afonso X O Sabio, acompañado das profesoras de historia da arte e debuxo Estefanía Fernández e Marta Moreira, tivo a oportunidade de acudir onte á exposición de Peter Lindbergh, onde recibiron unhas explicacións de compoñentes do grupo Arte-Facto do departamento de didáctica da Expresión Plástica da UDC. Esta vai ser unha das actividades previstas nos próximos dous meses que se van realizar dentro dunha colaboración entre a UDC e o noso instituto ao redor da obra deste eminente fotógrafo.

Aquí a noticia en La Voz de Galicia

Celebración do Día Mundal da Loita contra o SIDA (1 de decembro)

O Día da Loita contra o SIDA foi festexado grazas ao traballo do alumnado de Cultura Científica de 4º ESO e 1º bacharelato, que preparou un stand onde ademáis dunha maqueta do VIH e expositores de sobremesa -alusivos á estructura do virus, aos síntomas, formas de previr o contaxio, etc- estiveron presentes dous Noticieiros Científicos monográficos. No tempo de lecer o alumnado puido participar en xogos relativos ao tema

Celebración do día do ADN (25 de abril)

Para festexar esta efeméride, o alumnado de Bioloxía de 1º de bacharelato fixo unha demostración da extracción do ADN de amorodos, chícharos e tomate. 

A actividade ía acompañada dunha explicación de todos os pasos e, os asistentes, puidemos entender con gran claridade todo o proceso e comprendimos moi ben que é isto do ADN... 

Celebración da Semana Mundial da Inmunización 2021

Como todos os anos no mes de abril, a OMS establece unha semana adicada á Inmunización.  No presente curso, o Departamento de Bioloxía-Xeoloxía organizou varias actividades para esta eferméride durante a última semana de abril.

Por unha banda realizouse unha exposición- que enlaza cos paneis permanentes relacionados coa enfermidade da Covid 19- coa aportación de carteis preparados polo alumnado de 4º ESO. 

Por outra banda, o alumnado podía responder ás preguntas dun díptico axustado aos contidos da exposición, no que colaborou alumnado de Cultura Científica de 1º bacharelato e, nos recreos, houbo turnos de monitores de 4ºESO, que explicaron coa axuda de maquetas -elaboradas por alumnado de 4º e 1º bacharelato- a tecnoloxía das vacinas Covid 19.

Asistencia do alumnado de Bioloxía a dúas webinar

Na última semana o alumnado de Bioloxía de 1ºBacharelato tivo a oportunidade de asistir a dúas conferencias online (webinar) para tratar temas referidos á xenética. 

Por unha banda, o pasado venres 16 de abril puidemos escoitar ao microbiólogo e xenetista molecular César de la Fuente, catedrático da Universidade de Pensilvania e recentemente galardoado co Premio Princesa de Girona 2021. Este científico coruñés divulgou a súa especialización no deseño de moléculas por computador para eliminar posibles pandemias producias por superbacterias e os avances logrados polo grupo de investigación que dirixe na Universidade de Pensilvania no diagnóstico da Covid-19.

Por outra banda, o venres 23 de abril tivo lugar a conferencia "Genes, ambiente y salud" do Director do Centro Nacional del Genotipado de España, a cargo do Doutor Ángel Carracedo, co que se celebrou o día do ADN.

Actividade literaria con Cándido Pazó

 

Hoxe o IES Afonso X O Sabio organizou unha charla para todo o alumnado de 1º de Bacharelato cun dos máis recoñecidos dramaturgos galegos, Cándido Pazó. Neste caso a actividade estivo subvencionada polo Ministerio de Educación, dentro do programa Por qué leer a los clásicos? e versou sobre os xéneros literarios e, en concreto, sobre La tribuna de Emilia Pardo Bazán, a quen rendimos unha pequena homenaxe no ano do seu centenario. Por mor das restriccións da pandemia a actividade realizouse en dúas quendas, para que así puidese asistir todo o alumnado do curso. Desde aquí esperamos que sirva para reflexionar sobre as aportacións da gran escritora Emilia Pardo Bazán, de como escribiu sobre o noso entorno, das personaxes femininas e, tamén, de como se pode trasladar a narrativa ao teatro.

A actividade estivo organizada polo Equipo de Normalización Lingüística e vicedirección, coa colaboración dos departamentos de Lingua Galega e Castelá. Grazas a todos e a todas por asistir e colaborar.

Charla co pintor Jano Muñoz

 A pesar de que as actividades complementarias e extraescolares este ano van a estar moi limitadas, debido á pandemia que estamos sufrindo, o pasado mércores 4 de novembro tivo lugar, no salón de actos do noso instituto, unha actividade organizada polo departamento de Debuxo para o alumnado de Debuxo artístico de bacharelato. A actividade consistiu nunha presentación do pintor Jano Muñoz sobre a súa obra, quen ofreceu consellos ao alumnado alí presente.

Agradecemos enormemente ao departamento a organización da actividade, pero sobre todo á predisposición de Jano Muñoz por vir a visitarnos, esperando que sexan moitas máis veces e en mellores circunstancias.

Artigo en La Opinión de A Coruña

Artigo en El noticiero de Arteixo

Artigo publicado en La Voz de Galicia en prensa escrita

Visita a Navantia

O pasado día 6 de febreiro, o alumnado de 4ºESO  e 1ºBACH de tecnoloxía e tecnoloxía industrial visitaron as instalacións de Navantia (Ferrol).

Durante a visita, dunhas tres horas de duración, o alumnado visitou, en primeiro lugar, ExpoNav (Exposición Nacional de la Construcción Naval) considerado o museo máis ompleto de Europa na súa temática. Alí, e a través dunha visita guiada, recibiron múltiples e detalladas explicacións da historia naval da cidade, puidendo contemplar diferentes maquetas e varias pezas reais que proporcionan unha idea do que é a construcción dun barco. 

Terminada a visita ao museo e acompañados dun guía, visitaron as instalacións de Navantia (cunha extensión de preto dun millón de metros cadrados) e, como curiosidade, tiveron ocasión de ver as obras de reparación ue se están levando no buque Blue Star, barco que encallara o pasado mes de novembro na Ría de Ares.

Sen dúbidas esta foi unha visita moi interesante para o noso alumnado, que puido comprobar o funcionamento, organización e traballo dunha empresa destas magnitudes.