O mes de maio no IES Afonso X o Sabio está
pintándose de galego. Por iniciativa do Departamento de Lingua e Literatura
Galegas e o EDLG, en diferentes cursos lévase a cabo a proposta de realizar o
reto de falar en galego durante sete días, ou mesmo 21, da mañá á noite, en
todos os ámbitos; é sabido que a zona está moi desgaleguizada e a lingua ten un
uso practicamente nulo entre as xeracións novas, pero a situación está
cambiando, en principio por sete días.
Seguindo os pasos da iniciativa dos 21 días en galego
iniciado por Pilar Ponte, do IES da Póboa do Caramiñal, o éxito da actividade
no IES Afonso X de Cambre supera as expectativas máis optimistas. Nos recreos
xa é habitual escoitar grupos de alumnos e alumnas a falaren en galego, polos
corredores, e mesmo polas tardes, nas rúas e nas tendas da Barcala, o Temple ou
Cambre. Os primeiros sorprendidos foron os propios participantes no reto, pois
ignoraban que houbese tanta xente que coñece a lingua e que é quen de falala: “Faleille
en galego a miña avoa e contestoume en galego moi contenta”, “Non sabía que
miña nai falase galego, e fálao moi ben!”, “A caixeia do súper respondeume en
galego sorrindo”, explica o alumnado, moi sorprendido da reacción positiva da
veciñanza: “Un home pola rúa escoitoume falar cun amigo e díxolle a outro que
había ben tempo que non escoitaba aos rapaces falar en galego”. Nas clases
tamén se nota o cambio, e parte do profesorado súmase á iniciativa tras a
sorpresa inicial, respondendo en galego ao alumnado, impartindo nesta lingua unha
parte da clase, ou dando a clase en galego durante sete días. O principal
cambio é o ambiente que se crea nas aulas onde o galego pasou a ser a lingua
empregada maioritariamente: “Estámolo pasando moi ben con este reto”, “Como
todos o falamos, xa nos sae sen darnos conta”, “Pásame algo raro, creo que xa
penso en galego” ou “Canto máis o falas, máis fácil é!”, son atinadas
conclusións ás que o propio alumnado está chegando a partir da propia
experiencia, admirados de que tan só un par de días falando en galego teñan un
efecto tan evidente e satisfactorio. Practicamente ninguén reaxiu
negativamente, o cal dá pé a pensar que os prexuízos lingüísticos, tan
presentes nas xeracións anteriores, teñen menos peso nesta xeración, xa que
para a maioría da rapazada o galego non vén sendo máis que unha materia escolar
que hai que aprobar. Esperemos que aos sete primeiros días sigan outros sete e
sete máis, e que se cumpran as palabras que alguén lle dixo a unha alumna estes
días nunha rede social: “Ti falando galego! Flipo! Estamos cambiando o mundo!”.
Dulce Fernández Graña
Departamento de Lingua e Literatura Galegas
IES Afonso X o Sabio
0 comentarios:
Publicar un comentario