O IES Afonso X O Sabio está desenvolvendo, desde hai máis de 15
anos, un dos proxectos máis innovadores de Galicia para mellorar a
convivencia do centro. Dentro das distintas iniciativas que se
desenvolven anualmente, unha das máis importantes son as actividades de
formación que se ofrecen ao profesorado, xa que desde a Comunidade
Educativa consideramos que debemos seguir, permanentemente, mellorando
as competencias profesionais do profesorado, de forma que garantamos a
mellor educación e formación posible para o alumnado do centro. Así
pois, o próximo día 16 de xaneiro terá lugar, no IES Afonso X O Sabio,
unha actividade formativa encadrada dentro do itinerario de Convivencia
do Plan de Formación do Profesorado do instituto, que engloba tres
grupos de traballo diferenciados e diversos cursos sobre temáticas
variadas.
Neste caso contaremos coa presenza de Ricardo Fandiño, psicólogo clínico e presidente de ASEIA, é ademais coautor do libro La lucha sexual de los adolescentes en la hipermodernidad
(en colaboración con Vanessa Rodríguez Pousada, UOC, 2018). A través
desta formación, dotarase ao profesorado do IES Afonso X O Sabio de
coñecementos que lles permitan omprender dun xeito máis amplo a
realidade adolescente contemporánea, creando un espazo de encontro e
confianza no que se compartan ferramentas básicas no eido da xestión
emocional da adolescencia. Os contidos da actividade versarán sobre as
características xerais da adolescencia contemporánea, a maduración,
crise e conflito; a centralidade social; o doble cego adolescente e o
paso ao período adulto; a relación adulto-adolescente; a educación na
xestión das emocións e, finalmente, a loita sexual dos adolescentes
contemporáneos.
